He taupānga hou e ākona ai te reo Māori

14 Sep, 2020
 
Kōrerorero logo

E wātea ana tētahi taupānga utukore e whakaako ana me pēhea te whakamahi i te reo Māori i ētahi horopaki tūturu ki ō tātou ao, hei mea tiki ake mā te marea.

Kua whakawhanakehia a Kōrerorero i ngā tau e rua kua hori nei i Te Wānanga Aronui o Tāmaki Makaurau.

Ahatia tana hāngai pū ki te hunga tauhou ki te reo, he rauemi pai hoki te taupānga waea hou nei mā ērā e whai ana kia whanake tonu ō rātou pūkenga reo Māori, e ai ki te kaiako o AUT, ki tētahi hoki o ngā ringa waihanga i te taupānga, ki a Hēmi Kelly.

"Mai anō i te akoranga tuatahi ka rangona he kupu hei whakamahinga tonu atu māhau," ko tā Kelly.

"Inā te māmā ki te whakamahi ake, ka taea e te katoa, tae pū atu hoki ki ngā tamariki - nā konei, ka taea e te whānau whānui te ako ngātahi."

Ko tā ngā kaiwhakamahi i te taupānga utukore nei he āta whakatutuki i ngā akoranga e waru o Kōrerorero, katoa e hāngai ana ki ētahi mahi ka kitea i ia rā. Kei ia akoranga ko ētahi wāhanga 10, heke iho rānei, me ētahi mahi pāhekoheko.

"E aro ana ki te reo kōrero tērā i te reo tuhi. E honohono ana ōna wāhanga, ā, he wāhi nui tō te pūruatanga ki tōna hoahoatanga mai," ko tā Kelly.

He hua ngātahi a Kōrerorero nā Te Ara Poutama (Faculty of Māori and Indigenous Development - AUT) me te Tari Panoni Akoranga o AUT (altLAB).

Nā Te Ara Poutama i kōkiri te taha ki ngā kai o te taupānga, nāna hoki i tiaki te taha ki ngā mātauranga me ngā tikanga Māori. Nā te Kāhui Pāpāho Matihiko o altLAB te hoahoatanga, te whanaketanga me te tuaritanga o te taupānga i ārahi.

E ai ki tētahi anō o ngā ringa waihanga i te taupānga, ki a Ahorangi Hinematau McNeill, he nui te wāhi ki te whanaketanga mai o te kaupapa, tae atu ki ngā mahi hopu reo me ngā whakaahua, ā, me te arotake i ngā akoranga i runga i te whai kia māmā te whakahaere, he mea mahi nā ngā kaimahi me ō rātou whānau i runga i te aroha noa ki te kaupapa.

"Kāore hoki i tua atu i ngā pūkenga hangarau me ngā taunakitanga nui i tukuna mai e altLAB," hei tāna. "He tohu o tā rātou kaha tautoko i te reo Māori."

Kua whakamātauria whānuihia a Kōrerorero, nā runga i ana terenga whakamātautau e rua ki ana kai, ki ana āheinga, ki te āhua hoki e whakamahia ai ia. Kua āta arotakengia hoki ko ngā akoranga reo Māori o roto.

Hei mea whakamahi tēnei mā ngāi tūmatanui, mā ngā wānanga, mā ngā kura anō, hei hoa haere hoki mō ā rātou marautanga, e ai ki a Ahorangi McNeill.

"E tūmanako ana mātou ka āwhina a Kōrerorero i te whakarauoratanga mai o te reo Māori i Aotearoa," hei tāna.

"Ko te tukuhanga utukore atu o te taupānga nei ki te hunga akoako, hei mea whakapūmau i tō AUT manawanui ki te iwi Māori, ki te reo Māori anō."

He akoranga reo Māori e whakaakona ana hoki i Te Ara Poutama, i AUT.

E wātea utukore ana a Kōrerorero hei mea tiki ake i ngā pae  Apple App Store, me Google Play.

Useful links

Website search